Құрметті оқырмандар!

Сіздердің назарларыңызға «Uly Dala: қалалық және әлеуметтік зерттеулер журналы» пәнаралық журналының екінші нөмірін ұсынамыз. Жаңа журнал бола тұра, біз кеңінен қанат жаюға тырыстық — журналға түрлі авторларды: аттары танылған және жаңа авторларды тарттық. Соған қарамастан, біздің тарапымыздан көп күш жұмсамай, нөмір дәстүр мен модернизмнің симбиоз проблематикасы, сондай-ақ шаруашылық нысандарын, петроглифтер мен қалалық фольклор жанрларын тарихи қайта өңдеу және қайта ойлап шығару мәселелері төңірегінде «шоғырланған» болып шықты.

8-13 қыркүйек аралығында Астанада Дүниежүзілік көшпенділер ойындары өтті. Ойындардың эмблемасы қола дәуірінің жәдігері — Тамғалыдағы жартасқа салынған суреттерді көркемдік тұрғыдан қайта жаңғыру болды. Адия Баймурзинаның мақаласы осы тақырыпқа арналған.

Бесінші Дүниежүзілік көшпенділер ойындары Қазақстандағы алғашқы «Көшпенділер ойындары» және сонымен бірге қалалық кеңістіктегі осындай деңгейдегі алғашқы ойындар болды. Қырғызстанда ойындар Ыстықкөл аңғарында, ал Түркияда Бурса провинциясындағы Изник көлінің жағасында өтті. Қырғызстанда да, Түркияда да ойындар мегаполистерден алыс жерде — табиғат аясында өтті. Алайда, Астанада ойындарды ұйымдастырушылар еліміздің модернизмге деген ұмтылысын да, дәстүр рухына адалдығын да синтездеуге және қонақтарға көрсетуге тырысты. Спорт ойындардың көбі Астананың сол жағалауындағы жаңа стадиондарда өтті, ал негізгі ат спорттық ойындары қаланың оңтүстік шетінде орналасқан ипподромда өтті. Ойындардың өзі де, қалалық кеңістіктегі ойындардың түпнұсқалығын сынау да қоғамда дәстүр мен модернизм арасындағы симбиоз туралы пікірталасты қайта бастады.

Бұл тақырып жылқы шаруашылығын жандандыру туралы мақалада, сондай-ақ Египет сәулетшісі Абдельвахад Эль-Вакил туралы деректі фильмде кеңінен талқыланады. Фильмді жасаушылар Ольга Корчук пен Фуркат Палван-Задеге фильмнің транскрипциясын орыс тілінде басып шығаруға рұқсат бергені үшін алғыс айтамыз. Түпнұсқа мақалалардың барлық авторларына, сондай-ақ өз жұмыстарын аударуға рұқсат берген авторларға алғысымызды білдіреміз.

Назарбаев Университетiнің Социология мен антропология кафедрасының қауымдастырылған профессоры,

Алима Бисенова